11 xaneiro 2013

Comunicado de apoio a Laura Bugalho



Vivimos tempos escuros, e aínda queda o peor. Non hai nin tres días, por fin soltaron a Alfon, un rapaz que, cando se dirixía a un piquete na folga xeral do 14N, foi detido inxustamente xunto coa súa moza ao pouco de saír da súa casa. Pasou, practicamente, dous meses preso baixo o réxime FIES 5, un réxime penitenciario para persoas perigosas e con alto risco de fuga, polo que permanecía practicamente incomunicado, illado e apartado (todo isto sen antecedentes).


10 xaneiro 2013

34º aniversario da despenalización da homosexualidade

Este 11 de xaneiro de 2013 cúmprense 34 anos da modificación da Lei de Perigosidade e Rehabilitación Social, que abriu as portas para que as últimas persoas trans, homosexuais, bisexuais e intersexuais abandoaran os cárceres de Badaxoz e Huelva, despois incluso da celebración das primeiras eleccións xerais formalmente democráticas tras a ditadura franquista e da aprobación da vixente Constitución Española.

Aínda está moi vivo o recordo das persoas LGTBI que padeceron persecución e maltrato nos cárceres franquistas e das lesbianas que sufriron internamento e “electroshocks” en centros psiquiátricos. Décadas despois da fin da guerra, lesbianas, gais, trans, bisexuais e intersexuais continuaron sendo enviadxs a distintos “centros de reeducación” para seren torturadxs. Persoas que, ademais de soportar a inxente represión desatada dende 1936, ao saír das celdas víronse obrigadas a vivir nunha prisión do tamaño dun estado, co cárcere engadido do armario que ninguén podía atreverse a abrir, nin sequera na soa presenza dxs concidadáns igualmente perseguidxs pola súa ideoloxía política.